War Helaa Talo Hela Wararka maanta
Guutooyinka Cizziddiin Al-Qassam ayaa Isniintii si rasmi ah ugu dhawaaqay geerida shahiidnimo ee afhayeenkooda Abu Cubayda, iyagoo markii ugu horreysay shaaciyay magaciisa dhabta ah.
Bayaan ay soo saareen Guutooyinka ayaa lagu yiri:
“Waxaan baroordiiq u sameyneynaa hoggaamiyaha wajiga duuban ee Abu Cubayda, magaciisa dhabta ahna waa Xudhayfa Samir Cabdullaahi Al-Kaxluut (Abu Ibraahim), afhayeenka Guutooyinka Al-Qassam.”
Shahiidka Abu Cubayda wuxuu muddo sanado ah ahaa afhayeenka Guutooyinka Cizziddiin Al-Qassam, isaga oo aan waligiis hore loo shaacin magaciisa dhabta ah.
Waxa uu helay saameyn iyo taageero ballaaran oo heer Carbeed iyo Islaami ah, gaar ahaan kaddib hawlgalkii Duufaanta Al-Aqsa, oo ay iska-caabbinta Falastiiniyiintu ku qaadday saldhigyo iyo deegaanno gumeysi Israa’iil ah 7-dii Oktoobar 2023.
Muddooyinkii la soo dhaafay, Abu Cubayda wuxuu si joogto ah uga warrami jiray faahfaahinta iyo socodka hawlgallada milatari ee iska-caabbinta, isla markaana wuxuu caddeyn jiray mowqifyada jiidaha dagaalka, isaga oo ku xirnaa shacabka dunida ku dhowaad maalin kasta intii lagu jiray labadii sano ee la soo dhaafay.